Kursun ilk mərhələsində iştirakçılar proqramlaşdırmanın əsasları ilə tanış olur, dəyişənlər, riyazi əməliyyatlar, şərti ifadələr (if-else) və döngülər (for, while) kimi anlayışları öyrənirlər. Daha sonra Arduino platforması vasitəsilə elektronika dünyasına giriş edilir və LED, rezistor, breadboard kimi əsas komponentlərlə praktiki işlər həyata keçirilir.
Növbəti mərhələlərdə şagirdlər müxtəlif sensorlar (fotorezistor, ultrasonik sensor, PIR sensor), servo motorlar və PWM siqnalları ilə işləməyi öyrənir. Bu biliklər əsasında ağıllı ev sistemləri, avtomatik işıqlandırma və təhlükəsizlik sistemləri kimi real həyat layihələri hazırlanır. Kurs boyunca iştirakçılar praktiki yanaşma ilə öz layihələrini quraraq həm texniki biliklərini, həm də problem həll etmə bacarıqlarını inkişaf etdirirlər.
Proqramın ikinci hissəsində isə dron texnologiyalarına giriş verilir. Şagirdlər dronun əsas hissələrini öyrənir, çərçivə (frame) yığımı, motor və propellerlərin quraşdırılması, ESC və enerji sistemləri ilə işləmə kimi mühüm mərhələləri praktiki şəkildə mənimsəyirlər. Bundan əlavə, flight controller (idarəetmə bloku), sensorların kalibrasiyası və sistemin sazlanması kimi mövzular da əhatə olunur.
Kursun sonunda iştirakçılar dronun tam yığımını həyata keçirir, test və diaqnostika mərhələlərini öyrənir və təhlükəsiz şəkildə işləyən bir sistemi təqdim etmə bacarığı qazanırlar.
Bu bootcamp şagirdlərə yalnız nəzəri biliklər deyil, həm də real layihələr üzərində işləmə təcrübəsi qazandıraraq onların texnologiyaya marağını artırır, yaradıcılığını və mühəndislik düşüncə tərzini inkişaf etdirir.
